top of page
بحث
  • صورة الكاتبOmer Elhassan

مجموعة المحادثة المجانية باللغة الإنجليزية: الطريق السوداني إلى النجاح

تاريخ التحديث: ٢٥ ديسمبر ٢٠٢١

لازم تتعلم انجليزي، عارف ليه؟

لانها حتفتح ليك كل ابواب الفرص الممكنة ي زولي. اي زول طموح وعندوا احلام وتطلعات عالية محتاج يتعلم انجليزي، وانا متأكد انك الزول ده والا ما كنت قاعد تقرا كلامي ده هسي!


"حدود لغتك هي حدود عالمك"

جدول المحتويات




اللغة الإنجليزية هي اللغة العالمية المتفق عليها.

الانجليز والأمريكان اسسوا لغتهم على انها تكون اللغة المهيمنة في جميع انحاء العالم وده من خلال مزيج من الامبريالية والاقتصاد المزدهر والقوة الثقافية


ذي ما عارفين انوا الإنجليزية فرضت عبر المستعمرات وحالياً بقت مهارة اساسية ولابد منها في الحياة! لو مسكنا من التجارة والمعاملات البنكية لحدي الترفيه والسياسية بنلقى اللغة الانجليزية هي الأكثر استخداماً الى حداً بعيد ي صحبي!

ونحنا بصفتنا مستعمرة سابقة شفنا اثر القوة المستخدمة لممارسة السيطرة، وعلى الرغم من اننا الآن في حقبة ما بعد الاستعمار لكن لسه حاسين بآثاره.

وسواء كانت الحاجة دي دسيسة ولا ما دسيسة ي زولي اللغة الانجليزية بقت مهمة جداً شديد لكل الوظائف الزابطة سواء في الحكومة او الاعمال


صدقني حتندهش من كمية الابواب الحتقدر تفتحها!

اي منصب رفيع في شركة بيطلب تكون عندك انجليزي كويس بما انوا

  • ممكن تتكلم مع شركاء دوليين مثلاً الحكومات الأجنبية، الجمعيات الخيرية، منظمة الصحة العالمية او الامم المتحدة

  • ممكن تحتاج تراجع المستندات الي هي لازم تكون بالانجليزية طبعاً.

  • او ممكن تحتاج تعمل ابحاث بإستخدام مصادر انجليزية ذي انك تستعمل GitHub مثلاً او الإحصاءات الدولية

انك بتعرف تتكلم وتكتب وتقرا بالانجليزي ما معناها انك بتعرف الحاجات دي طبعاً، لكن انك ما بتعرف انجليزي معناها انوا فرصك ضعيفة جداً ي صحبي ودي حاجة حزينة.

هسي لو كنت الرئيس التنفيذي لشركة ناجحة كنت حتوظف منو؟ الاشخاص المميزين في سوق العمل اللي المنافسة فيه مشتعلة صح


جاء هذا المشروع إلى حيز الوجود عندما تواصل معي شخص بعد أول منشور تمهيدي في المدونة. بصراحة ، ما كنت متوقع أن

يقرأها زول. لكن أسماء قراته ، وأرسلت لي رسالة ، اتكلمنا وشرحت أن في مشكلة كبيرة في تعليم الخطابة باللغة الإنجليزية في السودان.

حالياً صحبتنا العزيزة اسماء قدرت تعلم نفسها الانجليزية من خلال التدرب على القراءة والكتابة لدرجة اني وبصفتي متحدث انجليزية اصلي ما كان عندي اي مشاكل في التواصل معاها من خلال الكتابة.

قالت انها اتعلمت من خلال قراءة الروايات والمانجا مع قاموس بتترجم بيه الكلمات الي ما قدرت تفهمها.

وعملت ده كلوا مع قراية الجامعة والازبط من ده كلوا انو عملتوا مجاناً!.

ممكن نطلب من اسماء تكتب لينا مدونة عن كيفية التعلم عشان انت كمان تستفيد، لو حاسي الحاجة دي حتكون مفيدة ورينا في تعليق تحت

ومع ذلك تعلم قراءة اللغة وكتابتها شي وانك تتكلم بيها ده شي تاني واصعب شويتين.

نحنا بنتعلم نصنع اصوات محددة لمن نكون صغار، حتلاحظ مثلاً انوا الخواجة ما بقدروا ينطقوا كلمة "خواجة" لانهم ما اتعلموا ينطقوا صوت الحرف العربي "خ" لما كانوا صغار!.

اما بالنسبة لينا كسودانيين التنغيم في لغتنا بيخلي اختيار كيفية نطق كلمة انجليزية حاجة صعبة. لحدي هسي امي وابوي بيتكلموا انجليزي بلكنة سودانية ودي حاجة جميلة وفريدة في نظري.

بقدر اقول انو الزول ده سواني بس من خلال لكنتوا الانجليزية

وعشان اديك مثال غالباً الناس الي بتكلموا عربي بينطقوا كلمة "People" كده "Beople" لانوا صوت الحرف "P" غير موجود عندهم.

افضل طريقة تكتشف بيها التفاصيل الدقيقة في النطق هي بالانخراط في المزيد من الاستماع والتحدث، الاستماع يعتبر ساهل لانو المحتوى الانجليزي بتلقاه في اماكن كتيره ذي نتفليكس واليوتيوبرز الي بيقدموا محتواهم باللغة الانجليزية، اما التدرب على المخاطبة يعتبر اكثر صعوبة!


عايز تتدرب مع متحدثين اصليين للغة وعندهم لكنة انجليزية ونطقهم كويس شديد!


عايز تدون ملاحظات عن الحاجات البتقولها عشان تعدل عليها وتخلي نطقها مطابق لنطق الكلمة الاصلية؟


حسب ما بعرف انوا في دورات للمخاطبة باللغة الانجليزية في السودان لكن الدورات دي غالية شديد، مبلغ 80 دولار شهرياً مثلاً بيتجاوز قدرت المواطن السوداني العادي، خاصة اذا كان طالب.


عشان كده وبعد الاخذ بنصيحة اسماء بأنوا ده حيكون استخدام مفيد لموارد "الهيكل" قررنا ننفذ المشروع ده

طيب كيف الحاجة دي حتحصل عشانك؟

  • شغالين على توظيف متطوعين بيتكلموا انجليزي كلغتهم الاولى هنا في المملكة المتحدة، معظمهم من اصول سودانية وبعضهم عاش في السودان لفترة

  • حنعمل مجموعة على تليجرام (الانترنت مستقر بنسبة كويسة على تطبيق تليجرام مقارنة بباقي التطبيقات) عشان يتعرف فيها السودانيين العايزين يتعلموا اللغة على متحدثين اللغة.

  • اي زول عايز ينضم لازم يعمل اشتراك في المدونة ويتابع صفحة الفيس بوك، وبعدها يرسل رسالة على فيس بوك باسمه والرقم المستخدم على تليجرام. وبرضوا عايزين نعرف مستواه في اللغة الانجليزية، الأولوية حتكون للي احرزوا تقدم في تعلم القراءة والكتابة.

  • بما انوا ده برنامج تطوعي بالنسبة لمعلمينا فالجلسات حتكون في الاوقات المتاح فيها المعلمين.

  • لا يوجد منهج محدد، مجرد ونسة ودية بتقدر تتكلم فيها عن اهتماماتك، او تناقش كتاب قريتوا او تتكلم عن حياتك وخبراتك التعليمية.

  • القاعدة الوحيدة هي انك لازم تتكلم بالانجليزية! مافي مشكلة تتناقشوا حول معنى كلمة او عبارة في اللغة العربية.


لو الموضوع عجبك منتظر شنو .. انضم هسي!!

اشترك في المدونة، تابع صفحة فيس بوك وراسلنا عبر الصفحة !


ما تتردد تعلق لينا تحت عن افضل الطرق الممكن نساعد بيها رفاقنا في السودان

المشروع ده بدأ لانوا في شخص اتواصل معانا.. ومين يعرف الطرق الاخرى الممكن نساعدك بيها!.


السلام عليكم, اخوكم عمر و شكرأ اسماء للترجمة

١٤١ مشاهدة٣ تعليقات

أحدث منشورات

عرض الكل

3 Comments


bill tim
bill tim
Dec 27, 2021

والله الفكرة دي فكرة عظيمة لانو نحن في السودان عندنا الانجليزي لغة مهمشة وليست ضرورية مع انها لغة عالمية بتفتح الآفاق وبتوسع الفرص فالمشروع دا لازم يمشي قدام ولازم الناس تحاول تنشر المعرفة باي طريقة ممكنة عشان الناس تتقدم

Like
Omer Elhassan
Omer Elhassan
Dec 27, 2021
Replying to

أنا سعيد لأنك تشعر بهذه الطريقة ، أحب أن تشارك ، لا تتردد في مشاركتها مع أصدقائك أيضًا. يمكنك إرسال رسالة نصية لي على الواتساب ، دعنا نتحدث!

Like

Salma Khalifa
Salma Khalifa
Dec 22, 2021

حاجه جميل جدا وممتازه كتير من الأشخاص دخلو كورسات واتعملوا الأساسيات لكن م كان عارفين طريقه لاتقان المخاطبه وانا حاليا بفضل الله داخله في تجربه اللغه الانجليزيه وعند طريق تطبيق اسمو طليق عن تجربه شخصيه هو ممتاز جدا ببدا مع الواحد من الصفر ممكن يفيد ناس كتير وانا الحمدلله مستواي ماشي في تحسن كبير بالتوفيق ليكم🌸🌸

Like
bottom of page